လှော်ကားဥယျာဉ်အတွင်း သဘာဝပတ်ဝန်းကျင်အလယ် အကွာအဝေးရှည် တောတွင်းလမ်းလျှောက်ခြင်းသည် အချိန်ကြာမြင့်စွာ လမ်းလျှောက်ခရီးသွားရင်း ကိုယ်ခန္ဓာကြံ့ခိုင်မှု၊ စိတ်ဓာတ်ခိုင်မာမှုနှင့် သဘာဝအတွေ့အကြုံများ ရရှိစေသော Outdoor Adventure Activity တစ်ခု ဖြစ်ပါသည်။

သိကောင်းစရာ အဖြာဖြာ

လှော်ကားအမျိုးသားဥယျာဉ်အတွင်း သဘာဝတောတောင်အလှတရားများကို အနီးကပ်ခံစားရင်း လမ်းလျှောက်ခရီးထွက်ခွာခြင်းသည် မိသားစုဝင်များ၊ လုပ်ဖော်ကိုင်ဖက်များနှင့် မိတ်ဆွေသူငယ်ချင်းများ စုပေါင်းဆင်နွှဲနိုင်သည့် အကောင်းဆုံး ပြင်ပစွန့်စားမှုခရီးစဉ်တစ်ခု ဖြစ်ပါသည်။ စိမ်းလန်းစိုပြည်သော သစ်တောရိပ်များအောက်တွင် ဖြတ်သန်းလျှောက်လှမ်းရင်း မြို့ပြ၏ မွန်းကြပ်မှုများမှ ကင်းဝေးကာ သဘာဝတရား၏ အေးချမ်းလန်းဆန်းမှုကို အပြည့်အဝ ရရှိစေမည် ဖြစ်ပါသည်။

ဤ Trekking အစီအစဉ်တွင် ခရီးသွားများ၏ စိတ်ကြိုက်ရွေးချယ်နိုင်ရန်အတွက် လမ်းကြောင်း (၂) မျိုး စီစဉ်ပေးထားပါသည်။ အချိန်တိုအတွင်း သဘာဝအလှကို ခံစားလိုသူများအတွက် (၃.၉) ကီလိုမီတာ အကွာအဝေးရှိ လမ်းတိုကို ရွေးချယ်နိုင်ပြီး ခန့်မှန်းကြာချိန် (၁:၃၀) နာရီခန့် ကြာမြင့်မည်ဖြစ်ကာ၊ စိန်ခေါ်မှုအပြည့်ဖြင့် သစ်တောအတွင်း နက်ရှိုင်းစွာ လေ့လာလိုသူများအတွက် (၇.၉) ကီလိုမီတာ အကွာအဝေးရှိ လမ်းရှည်ကို ရွေးချယ်နိုင်ပြီး ခန့်မှန်းကြာချိန် (၃:၀၀) နာရီခန့် ကြာမြင့်မည် ဖြစ်ပါသည်။

တောတွင်းလမ်းလျှောက်လမ်းတစ်လျှောက် သဘာဝအတိုင်း လွတ်လပ်စွာ ကျက်စားနေထိုင်ကြသော သမင်၊ ဒရယ်၊ ချေ၊ မျောက်များနှင့် ရေပျော်ဆောင်းခိုငှက်မျိုးစိတ်များကို အနီးကပ် တွေ့မြင်လေ့လာနိုင်ပါသည်။ ထို့အပြင် ဥယျာဉ်အတွင်းရှိ ကြိုးတံတား၊ သဘာဝရေကန်ရှုခင်းများနှင့် အရိပ်ရအနားယူစခန်းများကို ဖြတ်သန်းသွားရသဖြင့် ကိုယ်ခန္ဓာကြံ့ခိုင်မှုနှင့် စိတ်လက်ကြည်နူးမှုကို တစ်ပြိုင်နက် ပေးစွမ်းနိုင်မည့် လက်လွတ်မခံသင့်သော လှုပ်ရှားမှုတစ်ခု ဖြစ်ပါသည်။